Хятад-Монголын хилийн хамгийн том боомт болох Замын-Үүд, Эрээн хотын чиглэлийн зорчигч тээврийн галт тэргийн хөдөлгөөн сэргэж лхагва гарагийн өглөө эхний ээлжний 74 зорчигчийг хүлээж авлаа.

Цар тахлын улмаас 3 жил гаруйн хугацаанд түр зогсоод байсан Эрээн хот- Замын Үүд чиглэлийн зорчигч тээврийн гаалийн бүрдүүлэлтийн үйлчилгээ сэргэж, зорчигчид төмөр замаар хил нэвтрэх боломжтой болж байна.

Эрээн хотын төмөр замын боомт нь Хятад-Европын ачааны галт тэрэгний дунд гарцын нэвтрэх болон орох цорын ганц цэг юм.

Хоёр улсын зорчигч тээврийн төмөр замын хөдөлгөөн ийнхүү сэргэснээр Хятад-Монголын худалдааны өсөлтөд түлхэц болохоос гадна хоёр улсын аяллын маршрутыг хөнгөвчлөх болно.

Хятадын гадаад жуулчлалын хэтийн төлөв эерэг байгаа бөгөөд дэлхийн өнцөг булан бүрт зочлох Хятад жуулчдын тоо өсөх хандлагатай байна. Монгол улсад ирдэг нийт жуулчдын 30-аас илүү хувийг Хятад жуулчид дангаараа эзлэдэг бөгөөд энэ тоо баримт ирэх жилүүдэд илүү өсөх хандлагатай байгаа.

Тиймээс МАЖХ-оос Хятад жуулчдад зориулсан аялал, үйл ажиллагаагаа хэрхэн бэлтгэх болон Хятадын жуулчдад хэрхэн таатай сэтгэгдэл төрүүлэхэд туслах практик зөвлөмжийг бэлтгэн хүргэж байна. Хятад жуулчид бусад орны жуулчдын адил аяллын янз бүрийн сонголт, сонирхолтой байдаг ч тэдний юу хүсдэг талаар ойлголт өгөх тодорхой чиг хандлага, шинж чанарууд байдаг.

Танай бүтээгдэхүүн, аялалын туршлага зэргийн түүх

Хятад жуулчид түүхд дуртай. Удахгүй болох аялалдаа зориулж контент болон тайлбар хийхдээ тухайн аялалын бүтээгдэхүүнийхээ талаар хамгийн сайн танигдсан зүйлийг эхэлж оруулж өгөх хэрэгтэй. Үүнтэй зэрэгцээд Хятад улсад тухайн бүтээгдэхүүний талаар хэр танигдсан байгаа талаар суурь судалгаа хий. Хятадын эртний түүх, сурвалжид гардаг эсэх, Хятадын мэдээ, олон нийтийн сүлжээгээр тархсан эсэх зэрэг. Эдгээр мэдээлэл нь Хятад жуулчдын хандлагат өөрчлөлт оруулж, танай бүтээгдэхүүнтэй илүү ойр дотно харилцаа тогтооход тусалж, аяллын үеэр та бүхний тайлбарт илүү анхаарал хандуулах болно.

Аяллын маршрут

Аяллын маршрутыг төлөвлөх үедээ туршлага багатай аялагчид гүн гүнзгий утга учиртай үйл ажиллагаанаас илүүтэйгээр бага хэмжээний туршлага хуримтлуулахдаа анхаарах болно гэдгийг тооцоолоорой. Холын замд анх удаа аялж буй Хятад жуулчдын хувьд аялал гэдэг нь байр суурь, нэр хүнд гэсэн үг бөгөөд үүнийг тэд “Илүү их баяр баясгалан” гэсэн арга барилаар олж авахыг хүсдэг. Гэсэн хэдий ч хэт их ачаалалтай аялал хийхээс зайлсхийх нь чухал юм.

Мөн хол замд гарахдаа ариун цэврийн өрөө орох болон тамхи татах зогсолтыг тооцож цагаа төлөвлөх хэрэгтэй.

Байгалийн гоо үзэсгэлэн

Хятад улс хэдийгээр олон янзын байгалийн тогтоц бүхий орон боловч Хятад жуулчид дассанаасаа өөр байгалийн өвөрмөц онцлогтой газар руу татагддаг. Үүнд говь цөл, уулс нуруу болон бусад байгалийн өвөрмөц тогтоцууд багтана.

Худалдан авалт

Хятадын аялал жуулчлалын чухал хэсэг бол дэлгүүр хэсэх юм. Хятад жуулчид тансаг бараа, хувцас, гоо сайхны бүтээгдэхүүн, бэлэг дурсгалын зүйлс худалдаж авах дуртай. Тэд ихэвчлэн бусад улс орнуудад илүү чанартай эсвэл боломжийн үнэтэй гэж үзэж болох бүтээгдэхүүнийг эрэлхийлдэг.

Хоол

Хоол бол Хятадын олон жуулчдын аялалын салшгүй хэсэг юм. Тэд ихэвчлэн орон нутгийн хоол, хүнсийг туршиж үзэх, зочилж буй газрынхаа хоолны дүр төрхийг судлах сонирхолтой байдаг. Хооллож эхлэхийн өмнө хоолоо танилцуулах болон тэдэнд хоолныхоо зургийг дарах хугацааг өгөхөд тэд талархах болно. Хоол бол зөвхөн идэх хэрэгцээ биш тэдний хувьд цаг хугацаагаа таатай өнгөрүүлэх чухал мөч гэдгийг тооцоорой.

Гэр бүлд ээлтэй үйл ажиллагаа

Хятадын жуулчид ихэвчлэн гэр бүлээрээ аялдаг тул гэр бүлд ээлтэй үйл ажиллагаа, байр санал болгодог газрууд тэдний сонирхлыг татдаг. Түүнчлэн хэлний бэрхшээл үүдэхээс сэргийлж боломжтой бол Хятад хэл дээр бичигдсэн гарын авлага, брошуруудыг бэлдэх хэрэгтэй.

Технологи ба интернет сүлжээ

Хятад улс нь технологийн дэвшлээрээ алдартай бөгөөд зарим Хятад жуулчид аялалынхаа үеэр хамгийн сүүлийн үеийн технологи, орчин үеийн тохь тухыг мэдрэх сонирхолтой байдаг. Түүнчлэн тэд Wechat, Weibo зэрэг олон нийтийн платформ дээр идэвхтэй бөгөөд ихэвчлэн аяллынхаа зургийг найз нөхөд, гэр бүлтэйгээ хуваалцах дуртай. Тиймээс боломжтой бол үнэгүй Wi-Fi холболтыг санал болгох нь маш чухал. Энэ нь тэднийг аз жаргалтай болгох төдийгүй танай аяллын бүтээгдэхүүний хувьд томоохон, үнэгүй сурталчилгаа болно.  Мөн төлбөр тооцооны хувьд дижитал хэтэвч Wechat Pay-г ашиглах нь тэдэнд маш тухтай байх болно.

Аюулгүй байдал

Бүх аялагчдын нэгэн адил Хятадын жуулчид аялах газраа сонгохдоо аюулгүй байдлыг чухалчилдаг. Үүнд:

• Хувийн аюулгүй байдал
• Улс төрийн тогтвортой байдал
• Эрүүл мэнд, эмнэлэг, яаралтай түргэн тусламжийн үйлчилгээ, хүртээмж
• Байгалийн гамшгийн бэлэн байдал
• Луйвар залилан
• Хэлний бэрхшээл
• Аяллын талаарх зөвлөмж, сэрэмжлүүлэг зэрэг орно.

Аяллын дараа үргэлжлэх харилцаа

Хятадын гадаад аялал жуулчлал нь дэлхийн хамгийн том аялал жуулчлалын нэг тул аялал өндөрлөсний дараа ч гэсэн харилцаагаа хөгжүүлэхээ мартуузай. Бүх зүйлс цахим болсон энэ цаг үед жишээ нь нэрийн хуудас дээрээ та бүтээгдэхүүн, компанийн танилцуулга, вебсайт, хаяг зэргээ QR кодоор үлдээх хэрэгтэй. Ингэснээр нэг хэрэглэгчийн аялал дууссан ч хэдий ч дараа дараачийн олон амжилттай аялал, бизнес харилцааны эхлэл болж чадна.

Монгол, Хятад хоёр орны харилцаа түүх, соёл, эдийн засаг, аялал жуулчлал, геополитикийн хүчин зүйлсийн нөлөөгөөр олон жилийн турш хөгжиж ирсэн. Аялал жуулчлалын салбарын харилцааг эхнээс нь тоймлон хүргэе.

Түүх, соёлын хэлхээ холбоо: Монгол, Хятад хоёр газарзүйн хувьд уул усаар холбогдон оршдог мөнхийн хөрш орнууд тул соёл, худалдааны хамтын ажиллагааны урт түүхтэй. Эртний худалдааны замын сүлжээ болох Торгоны зам нь хоёр бүс нутгийг холбож, бараа бүтээгдэхүүн, үзэл санаа, соёлын солилцоог хөнгөвчилсөн.

Орчин үеийн өмнөх эрин: Орчин үеийн аялал жуулчлалын салбар үүсэхээс өмнө Монгол, Хятадын хооронд аялал жуулчлалын төрөл бүрийн хэлбэрүүд аль хэдийн бий болсон. Эдгээр солилцоонд ихэвчлэн худалдаачид, дипломатууд, эрдэмтэд, хайгуулчид бүс нутгуудын хооронд нүүдэллэдэг судлаачид багтдаг байв.

20-р зуун: 20-р зууны эхээр Монгол Улс тусгаар тогтнолоо зарлаж, 1924 онд Бүгд Найрамдах Монгол Ард Улс болсон бөгөөд энэ үед улс төр, эдийн засгийн хүчин зүйлс аялал жуулчлалын харилцаанд нөлөөлж, үзэл суртлын зөрүүтэй байдлаас үүдэн хоёр орны аялал жуулчлал хязгаарлагдмал байсан.

20-р зууны сүүлч: ЗХУ задран унаж, Монголын улс төрийн тогтолцоо либералчлагдсанаар хоёр улсад аялал жуулчлалын салбар сэргэж эхэлсэн. Түүнчлэн Хятадын эдийн засгийн шинэчлэл нь Хятадын иргэдийн дотоод болон гадаадад зорчих аялалыг нэмэгдүүлэхэд хүргэсэн.

21-р зуун: 21-р зуунд Монгол-Хятадын аялал жуулчлал эрс нэмэгдсэн. Хятадын эдийн засгийн өсөлт, дундаж давхарга нэмэгдсэн нь олон улсын аялал жуулчлалын эрэлт хэрэгцээг нэмэгдүүлж, Монгол улс өвөрмөц соёл, түүх, байгалийн үзэсгэлэнт газруудаараа сонирхол татахуйц газар болсон.

Соёлын болон байгалийн үзэсгэлэнт газрууд: Монгол улс говь цөл, уудам тал нутаг, нүүдэлчдийн уламжлалт соёл, Монголын эзэнт гүрний эртний нийслэл Хархорум зэрэг түүхэн дурсгалт газруудыг санал болгодог. Эдгээр сонирхол татахуйц газрууд нь өөр соёл, байгалийн орчныг мэдрэх сонирхолтой Хятадын жуулчдыг ихээр татах болсон.

Эдийн засгийн нөлөө: Аялал жуулчлал бол Монгол Улсын эдийн засгийн онцлох салбаруудын нэг бөгөөд орлогын чухал эх үүсвэр болсон. Жил бүр Монгол улсыг зорин ирдэг олон улсын жуулчдын ихэнх хувийг Хятадын жуулчид эзэлдэг бөгөөд тогтмол эхний 3-т жагссаар байдаг юм.

Геополитикийн хүчин зүйлүүд: Монгол, Хятадын харилцаа, тэр дундаа аялал жуулчлалын салбарын харилцаанд геополитикийн хүчин зүйлс нөлөөлдөг. Монгол Улс бүрэн эрхт байдал, соёлын өвөрмөц байдлаа хадгалахын зэрэгцээ том хөрштэйгөө харилцаагаа тэнцвэржүүлэхийг эрмэлздэг.

Дэд бүтэц ба холболт: Зам тээвэр, дэд бүтэц сайжирсан нь Монгол, Хятад хоёр улсын хооронд зорчих боломжийг хөнгөвчлөх, жуулчдыг хоёр улсын хооронд зорчиход хялбар болгосон.

Бэрхшээл ба боломжууд: Аялал жуулчлалын харилцаа ерөнхийдөө эерэг байсан ч дэд бүтцийн хөгжил, аялал жуулчлалын тогтвортой үйл ажиллагаа, соёлын хадгалалт зэрэгтэй холбоотой бэрхшээлүүд байсаар байна. Аялал жуулчлалын эдийн засгийн үр өгөөжийг байгаль орчин, соёлын хадгалалттай тэнцвэржүүлэх нь байнгын анхаарал хандуулах ёстой юм.

Соёлын солилцоо: Аялал жуулчлал нь хоёр орны хооронд соёлын солилцоо, харилцан ойлголцох боломжийг олгодог. Тогтмол зохион байгуулагддаг арга хэмжээ, баяр наадам зэрэг нь хоёр улсын аялагчдын хоорондын олон талт харилцан ойлголцол, итгэлцлэлийг бий болгодог.

Дүгнэлт; Монгол, Хятадын аялал жуулчлалын салбарын харилцаа түүх, соёл, эдийн засаг, геополитикийн хүчин зүйлсийн нөлөөгөөр цаг хугацааны явцад хөгжиж ирсэн. Хоёр улс аялал жуулчлалыг нэмэгдүүлсний үр шимийг хүртэж байгаа ч тус тусын соёл, байгалийн өвийн тогтвортой байдлыг хангах, хамгаалахад тулгамдаж буй асуудал бас бий.

Монгол, Оросын агаарын тээврийн хамтын ажиллагааны хүрээнд хоёр улс өөрсдийн нутаг дэвсгэрээр дамжин өнгөрөх нислэгийн тоог нэмэгдүүлэхээр тохиролцов. Энэхүү эерэг мэдээ ОХУ-ын Агаарын Тээврийн Агентлаг Росавиацийн цахим хуудсанд тавигдсан бөгөөд хоёрын улсын нисэхийн удирдлагуудын зөвлөлдөх протоколоос гарсан үр дүн юм.

Протоколын агуулгад зааснаар Монгол, Орос хоёр улсын хооронд нислэгийг хязгаарлалт түүнчлэн ачаа тээврийн нислэгийг хязгаарлалтыг арилгахаар шийдвэрлэсэн байна. Хоёр тал долоо хоног бүрийн нислэгийг давтамжийг чиглэл тус бүрт долоо хүртэл нэмэгдүүлэхээр болжээ.

Энэхүү тохиролцооны дагуу Оросын агаарын тээврийн компаниуд зөвхөн Улаанбаатар хотоос гадна, Чойбалсан, Өлгий, Улаангом гэсэн чиглэлүүд рүү нислэг үйлдэх боломжийг өргөжүүлэх бол Монголын тал ч гэсэн Оросын Москва, Екатеринбург, Эрхүү, Чит, Улаан-Үүд, Новосибирск, Кизил зэрэг хотууд руу нислэг үйлдэх боломжтой болж байна.

Нислэгийн давтамжийг ийнхүү сайжруулж, хязгаарлалтыг цуцалсан нь Орос, Монголын эдийн засаг, соёл, дипломат харилцаа, аялал жуулчлалыг хөгжүүлээд зогсохгүй  хүн амын шилжилт хөдөлгөөнийг хөнгөвчлөх, бизнес эрхлэгчдэд таатай нөхцлийг бүрдүүлэх улмаар хоёр орны ойр дотно харилцааг бэхжүүлэх болно.

БНХАУ-ын Өвөр Монголын өөртөө засах орны Хянган аймгийн Рашаан хотод Аялал жуулчлалын чуулга уулзалт есдүгээр сарын 2,3-ны өдрүүдэд зохион байгуулахаар болсныг Хятадын Соёл, Аялал жуулчлалын яамнаас зарлажээ.

Их Хянганы нурууны баруун өмнөд бэлд, дөрвөн том бэлчрийн уулзварт оршдог Рашаан хот нь Хятадын дотоодын жуулчдын хамгийн очих дуртай газар болж байна.

Чуулганы үеэр нээлтийн үйл ажиллагаанаас гадна Их Хянганы нурууны аялал, Соёлын аялал жуулчлалын нэгтгэл ба ногоон хөгжлийн форум, “Соёлын биет бус өв ба аялал жуулчлал” төслийн үзэсгэлэн болон бусад хөтөлбөрүүдийг зохион байгуулах юм.

Рашаан хот нь манай улсын Дорнод аймагтай хил залгаа оршдог, хоёр улсын Сүмбэр-Рашаант хилийн боомтоос 45 км зайтай оршдог.  75 төрлийн халуун, хүйтэн рашаанаараа улсдаа алдартай энэ хот зуны улиралд дотоодын хоёр сая дөрвөн зуун мянган жуулчин эрүүл мэндийн аяллаар хүлээн авдаг байна.

Өвөр Монголын аялал жуулчлалын зах зээл 2023 онд эрчимтэй хөгжиж байна. 1-7-р сард тус бүс нутаг 124 сая дотоодын жуулчин хүлээн авч, 176 тэрбум 220 сая юань буюу 24 тэрбум 480 сая ам.долларын аялал жуулчлалын орлого олжээ.

2023 онд зочид буудал, амралтын газарт захиалга өгсөн нийт орос жуулчдын ердөө 2.7% нь Кримийн ойролцоох газруудыг сонгожээ.

Оросын аялалын хайлт, захиалгын үйлчилгээний систем Sletat.ru-ийн мэдээлснээр энэ зуны аяллын улиралд Крим рүү зорих жуулчдын Оросын дотоод зах зээлд эзлэх хувь 2.7% хүртэл буурсан гэж борлуулалтын статистик харуулж байна гэв.

/Орос улс 2014 онд өөртөө нэгтгэж зарласан Кримийг өөрсдийн нутаг дэвсгэрийн нэг хэсэг гэж үздэг тул үүнийг дотоодын зах зээлд хамруулдаг/

Оросын өөр нэг захиалгын үйлчилгээ болох Островокийн мэдээлж байгаагаар аялал жуулчлалын оргил үеэр Кримийн хойгт амрах хүсэлтэй хүмүүсийн тоо өнгөрөгч оныхтой харьцуулахад 50-60%-иар буурсан гэжээ.

Севастопол, Евпатория зэрэг хотуудын захиалга 66-69-%-иар буурсан бөгөөд үүний улмаас Евпатория хотод байрлах нэг хоногийн зардал 21%-иар унаж 3,800 рубль болжээ. Баруун Кримд үйл ажиллагаагаа явуулдаг Алаен жуулчны баазын захиалгын тоо энэ зун 50%-иар багасжээ.

Оросын Тур Операторуудын Холбооны дэд ерөнхийлөгч Сергей Ромашкин хэлэхдээ:

“Дотоодын жуулчдын Кримийн хойг руу аялах дургүй байгаа нь Крим дэх Орос-Украйны дайны нөхцөл байдал, Кримийн гүүрэн дээрх дэлбэрэлт, замын түгжрэл зэрэг шалтгаанууд нөлөөлж байгаа гэв. Тус бүс нутагт энэ оны эхний найман сарын байдлаар 3.7-3.9 сая жуулчин ирээд байна”

ОХУ-ын статистик мэдээллээр 2021 онд Кримд 9.5 сая жуулчин ирж байв.

Эх сурвалж: Коммерсант сонин, Оросын багц аялал, зочид буудлын хайлт, захиалгын үйлчилгээний судалгаа

Цар тахлын улмаас тэг зогсолт зарлаад байсан аялал жуулчлалын салбар эргэн сэргэж эхэллээ. Тодруулбал, 2023 оны эхний хагас жилийн байдлаар аялал жуулчлалын чиглэлээр үйл ажиллагаа явуулдаг аж ахуйн нэгжүүд 63.6 тэрбум төгрөгийн татвар төлжээ. Монгол Улсын засгийн газраас аялал жуулчлалын салбарыг эдийн засгийн тэргүүлэх чиглэл болгон зарлаж 2023-2025 оныг “Монголд зочлох жил” болгон ажиллаж байна.

Уг ажлын хүрээнд 2023 онд “Нэг сая” жуулчин хүлээн авах зорилт тавьсан. Өнөөдрийн байдлаар Монгол Улсад 393.461 жуулчин иржээ. Аялал жуулчлалын чиглэлээр үйл ажиллагаа явуулдаг аж ахуйн нэгж, зочид буудлын үйлчилгээ эрхлэгч байгууллагуудын жил бүр төлж буй татварын хэмжээг авч үзвэл нэмэгдсэн статистик харагдаж байгааг албаныхан мэдээллээ. Үүнд,

• 2019 онд 1320 байгууллага 87,1 тэрбум төгрөг,
• 2020 онд 1348 байгууллага 47,1 тэрбум төгрөг,
• 2021 онд 1401 байгууллага 65 тэрбум төгрөг,
• 2022 онд 1637 байгууллага 94,2 тэрбум төгрөг,
• 2023 оны эхний 6 сарын байдлаар 1376 байгууллага 63,6 тэрбум төгрөгийн улсын төсөвт оруулсан байна.

Монгол орныг зорин ирэх жуулчдын тоо өдрөөс өдөрт нэмэгдэж буй энэ үед аялал жуулчлалын салбарыг хөгжүүлж чадвал улсын эдийн засагт чухал ач холбогдолтой юм. Энэ оны хагас жилийг өмнөх оны мөн үеүдтэй харьцуулахад татварыг орлого нэмэгдэж, давах үзүүлэлттэй байна.

Эх сурвалж: news.mn

Аялал жуулчлалыг хөгжүүлэх Үндэсний хорооны 2023 оны хоёрдугаар хуралдаан боллоо.

Хуралдааныг нээж Аялал жуулчлалыг хөгжүүлэх Үндэсний хорооны дарга, Ерөнхий сайд Л.Оюун-Эрдэнэ үг хэлэв. Тэрбээр Үндэсний хорооны анхдугаар хуралдаанаас гарсан шийдвэрийн хэрэгжилт, өнгөрсөн хугацаанд авч хэрэгжүүлсэн ажлын зарим үр дүнгээс дурдаад цаашид өмнөх шийдвэрүүддээ дүгнэлт хийж, ололт амжилтаа бататган ажиллах хэрэгтэйг тэмдэглэв. Тухайлбал, “Welcome to Mongolia” арга хэмжээг Япон, БНХАУ, БНСУ-д зохион байгуулж, тус уриан дор Эдийн засгийн форумыг зохион байгуулан, нийт 2000 гаруй зочин, гадаадын өндөр түвшний 500 гаруй зочин, төлөөлөгчид Монголд ирсэн байна. Мөн “Welcome to Mongolia” арга хэмжээний хүрээнд  CNN, Financial Times, Washington Post зэрэг 40 гаруй дэлхийн томоохон хэвлэл мэдээллийн хэрэгслээр манай улсын тухай эерэг мэдээ, нийтлэл гарчээ. Мөн агаарын тээврийн либералчлалын бодлогын үр дүнд 2023 онд 40 гаруй улсын 150 чиглэлд нислэг хийх боломж бүрдсэн төдийгүй долдугаар сарын 1-нээс дотоодын нислэгүүдийг сэргээж эхэлснээс хойш нийт 32 мянган хүн тээвэрлэсний ихэнх нь гадаадын жуулчид байгаа юм.

Мөн “Аялал жуулчлалын тухай хууль”-ийн шинэчилсэн найруулга батлагдсан. Цаашид хуулийн хэрэгжилтийг шуурхайлж, аялал жуулчлалын үйл ажиллагааны менежментийг мэргэжлийн холбоонд шилжүүлж, төр гагцхүү бодлого, хууль, журмаа улам боловсронгуй болгож, төр, хувийн хэвшлийн түншлэлээр аялал жуулчлалыг эрчимтэй хөгжүүлэх  нь зүйтэй гэдгийг Ерөнхий сайд онцлов. “Жуулчдын тоо нэмэгдэж байгаатай зэрэгцэн ариун цэврийн байгууламжийн асуудал хөндөгдөж буй. Аялагч, жуулчдын санал, шүүмжийг ажил хэрэгтээ тусгаж, “Монголд зочлох жил”-ийн хүрээнд орчин үеийн ариун цэврийн байгууламжийг аялал жуулчлалын гол маршрутын дагуу барьж байгуулсан, аялал жуулчлалын иж бүрэн стратегитай байх ёстой” гэдгийг хэллээ. Түүнчлэн “Гадаадын аялал жуулчлалын зах зээлд танигдаж эхэлсэн “Welcome to Mongolia” уриа, арга хэмжээндээ түшиглэн өвлийн аялал жуулчлалын концепц, стратегийг яаралтай гаргаж, хэрэгжүүлэх ажлыг одооноос эхлүүлэх шаардлагатай” гэв.

Хуралдаанаар жуулчдад зориулсан ариун цэврийн байгууламж бүхий түр буудаллах цэг, үйлчилгээний цогцолбор, отоглох цэг байгуулах ажлын явц, тулгамдаж буй асуудал, өвлийн аялал жуулчлалын стратеги төлөвлөлт, гадаад зах зээлд чиглэсэн маркетинг, жуулчдын эрх ашгийг хангах утасны үйлчилгээ зэрэг асуудлыг хэлэлцэж, санал солилцов. Ариун цэврийн байгууламжийн асуудлыг эцэслэн шийдвэрлэх, тооцоо судалгаа хийж танилцуулах чиглэлээр холбогдох албан тушаалтнуудад хугацаат үүрэг даалгавар өгөв. Манай улсын аялал жуулчлалын салбарын өнөөгийн байдалд үнэлгээ, дүгнэлт хийх, цаашид аялал жуулчлалын брэнд бүтээгдэхүүнийг тодорхойлоход хамтран ажиллах боломжит, аялал жуулчлалын салбарт нэр хүнд бүхий олон улсын зөвлөх компаниудын талаар судалж, танилцуулахыг Соёлын сайд Ч.Номин, Аялал жуулчлалын мэргэжлийн холбооны ерөнхийлөгч Ц.Баатарсайхан нарт даалгав. Мөн ирсэн жуулчдаа сэтгэл хангалуун буцаах нь цаашид олон жуулчин татах нөхцөлийг бүрдүүлэх тул жуулчдын эрх ашгийг хангах үйлчилгээ үзүүлэх, санал гомдлыг хүлээн авч, шуурхай шийдвэрлэх утсыг ажиллуулах, уг Үндэсний хороог байнгын ажиллагаатай Ажлын албатай болгож, аялал жуулчлалын салбарын мэргэжлийн хүмүүсийг бүрэлдэхүүнд нь оруулан ажиллуулах зэрэг асуудлыг судалж, дараагийн хуралдаанд танилцуулахыг тус тус үүрэг болголоо.

Манай улс одоогийн байдлаар 387,034 жуулчин хүлээн аваад байгаа бөгөөд жуулчлалын тоо баримтаас харахад аравдугаар сар гэхэд 500 мянга орчим жуулчин ирсэн байх төлөвтэй байна.

Эх сурвалж: www.montsame.mn