Аялал жуулчлалыг хөгжүүлэх Үндэсний хорооны 2023 оны хоёрдугаар хуралдаан боллоо.

Хуралдааныг нээж Аялал жуулчлалыг хөгжүүлэх Үндэсний хорооны дарга, Ерөнхий сайд Л.Оюун-Эрдэнэ үг хэлэв. Тэрбээр Үндэсний хорооны анхдугаар хуралдаанаас гарсан шийдвэрийн хэрэгжилт, өнгөрсөн хугацаанд авч хэрэгжүүлсэн ажлын зарим үр дүнгээс дурдаад цаашид өмнөх шийдвэрүүддээ дүгнэлт хийж, ололт амжилтаа бататган ажиллах хэрэгтэйг тэмдэглэв. Тухайлбал, “Welcome to Mongolia” арга хэмжээг Япон, БНХАУ, БНСУ-д зохион байгуулж, тус уриан дор Эдийн засгийн форумыг зохион байгуулан, нийт 2000 гаруй зочин, гадаадын өндөр түвшний 500 гаруй зочин, төлөөлөгчид Монголд ирсэн байна. Мөн “Welcome to Mongolia” арга хэмжээний хүрээнд  CNN, Financial Times, Washington Post зэрэг 40 гаруй дэлхийн томоохон хэвлэл мэдээллийн хэрэгслээр манай улсын тухай эерэг мэдээ, нийтлэл гарчээ. Мөн агаарын тээврийн либералчлалын бодлогын үр дүнд 2023 онд 40 гаруй улсын 150 чиглэлд нислэг хийх боломж бүрдсэн төдийгүй долдугаар сарын 1-нээс дотоодын нислэгүүдийг сэргээж эхэлснээс хойш нийт 32 мянган хүн тээвэрлэсний ихэнх нь гадаадын жуулчид байгаа юм.

Мөн “Аялал жуулчлалын тухай хууль”-ийн шинэчилсэн найруулга батлагдсан. Цаашид хуулийн хэрэгжилтийг шуурхайлж, аялал жуулчлалын үйл ажиллагааны менежментийг мэргэжлийн холбоонд шилжүүлж, төр гагцхүү бодлого, хууль, журмаа улам боловсронгуй болгож, төр, хувийн хэвшлийн түншлэлээр аялал жуулчлалыг эрчимтэй хөгжүүлэх  нь зүйтэй гэдгийг Ерөнхий сайд онцлов. “Жуулчдын тоо нэмэгдэж байгаатай зэрэгцэн ариун цэврийн байгууламжийн асуудал хөндөгдөж буй. Аялагч, жуулчдын санал, шүүмжийг ажил хэрэгтээ тусгаж, “Монголд зочлох жил”-ийн хүрээнд орчин үеийн ариун цэврийн байгууламжийг аялал жуулчлалын гол маршрутын дагуу барьж байгуулсан, аялал жуулчлалын иж бүрэн стратегитай байх ёстой” гэдгийг хэллээ. Түүнчлэн “Гадаадын аялал жуулчлалын зах зээлд танигдаж эхэлсэн “Welcome to Mongolia” уриа, арга хэмжээндээ түшиглэн өвлийн аялал жуулчлалын концепц, стратегийг яаралтай гаргаж, хэрэгжүүлэх ажлыг одооноос эхлүүлэх шаардлагатай” гэв.

Хуралдаанаар жуулчдад зориулсан ариун цэврийн байгууламж бүхий түр буудаллах цэг, үйлчилгээний цогцолбор, отоглох цэг байгуулах ажлын явц, тулгамдаж буй асуудал, өвлийн аялал жуулчлалын стратеги төлөвлөлт, гадаад зах зээлд чиглэсэн маркетинг, жуулчдын эрх ашгийг хангах утасны үйлчилгээ зэрэг асуудлыг хэлэлцэж, санал солилцов. Ариун цэврийн байгууламжийн асуудлыг эцэслэн шийдвэрлэх, тооцоо судалгаа хийж танилцуулах чиглэлээр холбогдох албан тушаалтнуудад хугацаат үүрэг даалгавар өгөв. Манай улсын аялал жуулчлалын салбарын өнөөгийн байдалд үнэлгээ, дүгнэлт хийх, цаашид аялал жуулчлалын брэнд бүтээгдэхүүнийг тодорхойлоход хамтран ажиллах боломжит, аялал жуулчлалын салбарт нэр хүнд бүхий олон улсын зөвлөх компаниудын талаар судалж, танилцуулахыг Соёлын сайд Ч.Номин, Аялал жуулчлалын мэргэжлийн холбооны ерөнхийлөгч Ц.Баатарсайхан нарт даалгав. Мөн ирсэн жуулчдаа сэтгэл хангалуун буцаах нь цаашид олон жуулчин татах нөхцөлийг бүрдүүлэх тул жуулчдын эрх ашгийг хангах үйлчилгээ үзүүлэх, санал гомдлыг хүлээн авч, шуурхай шийдвэрлэх утсыг ажиллуулах, уг Үндэсний хороог байнгын ажиллагаатай Ажлын албатай болгож, аялал жуулчлалын салбарын мэргэжлийн хүмүүсийг бүрэлдэхүүнд нь оруулан ажиллуулах зэрэг асуудлыг судалж, дараагийн хуралдаанд танилцуулахыг тус тус үүрэг болголоо.

Манай улс одоогийн байдлаар 387,034 жуулчин хүлээн аваад байгаа бөгөөд жуулчлалын тоо баримтаас харахад аравдугаар сар гэхэд 500 мянга орчим жуулчин ирсэн байх төлөвтэй байна.

Эх сурвалж: www.montsame.mn

Богд хааны ордон музейг сэргээн засварлах ажил 50 гаруй хувийн гүйцэтгэлтэй үргэлжилж байна.

Энэ ондоо багтаан засварлалтын ажлыг дуусгахаар төлөвлөжээ. Монгол Улсын Засгийн газраас Монголын түүх соёл, өв уламжлалд тодорхой байр суурь эзэлдэг дурсгалуудаа тогтвортой хамгаалж, сэргээн засварлан хойч үедээ өвлүүлэн үлдээх зорилтыг тавин ажиллаж буй.

Богд хааны ордон музей бол Монголын ууган бөгөөд хамгийн баялаг сан хөмрөг бүхий түүх соёлын үл хөдлөх дурсгалт байгууламж юм. 1893-1903 онд барьсан тус музейд XVII-XX зууны үеийн Монголын хаант төр, шашин түүх, урлаг соёлын давтагдашгүй, хосгүй үнэт дурсгалууд хадгалагдаж байдаг. 120 гаруй жилийн настай. 

Хамгийн сүүлийн бүрэн хэмжээний сэргээн засварлалт 1961-1962 онд хийсэн бөгөөд сүүлийн 60 гаруй жилийн хугацаанд жижиг хэмжээний сэргээн засварлах ажил хийж байсан ч энэ удаагийнх шиг бүрэн хэмжээний сэргээн засварлалт хийж байгаагүй юм. Энэ удаад Бурхдын сүм, Найдан сүм, Лавиран сүмүүдийг сэргээн засварлаж байна. Одоогоор Бурхдын сүмийн шалны дэр моднуудыг тавьж, шал шахахад бэлэн болжээ. Суулт өгсөн 3 баганын суурийг ухаж гаргасан. Мөн Найдан сүмийн дээврийн ваарыг хуулж, шинээр дээвэрлэх ажил хийж байна. 

Богд хааны ордон музейн сэргээн засварлалтыг Бүгд Найрамдах Энэтхэг Улс болон БНСУ-ын соёлын өв, уран барилга, архитектурын дурсгалыг сэргээн засварладаг, олон улсын туршлагатай мэргэжилтнүүдийг урьж авчран ажиллуулсан. Мөн Монголын мэргэжилтнүүд оролцсон. Ингээд тал талын тэргүүн туршлагыг шингээж, сэргээн засварлах арга зүй, бодлогоо боловсруулан ажиллаж байна. 

Эх сурвалж: www.montsame.mn

Шри-Ланк улсын ерөнхийлөгч Ранил Викремесинг ойрын саруудад “Шри-Ланкад зочил” нэртэй шинэ төлөвлөгөөг хэрэгжүүлэх болсныг мэдэгдлээ.

Ерөнхийлөгч Ранил Викремесинг нь тус улсын эдийн засгийн гол хөдөлгөгч хүч бол Аялал жуулчлалын салбар юм гэдгийг онцлон тэмдэглээд энэ онд засгийн газар 5 сая жуулчин хүлээж авах төлөвлөгөөтэй байгаа бөгөөд үүний тал нь буюу 2.5 сая нь тансаг зэрэглэлийн жуулчид байх болно гэжээ. Тиймээс  Шри-Ланкийн дэлхийн аялал жуулчлалын зах зээлд өрсөлдөх чадварыг нэмэгдүүлэхийн тулд аялал жуулчлалын салбарыг өөрчлөх шаардлагатай. Түүнчлэн хоолны аялал жуулчлалыг хөгжүүлэхэд түлхүү анхаарна гэсэн байна.

Зочлох үйлчилгээний салбар, тэр дундаа хоолны аялал жуулчлалын чиглэлээр боловсон хүчин бэлтгэх шаардлагатай бөгөөд засгийн газар нь хувийн хэвшилтэй хамтран хоолны сургууль байгуулахад бэлэн болсон гэнэ.

Шри-Ланк улс 2023 онд 2 сая жуулчин хүлээж авахаар төлөвлөж байгаа бөгөөд өнгөрөгч жил 1.5 сая жуулчин хүлээж авч байжээ.

БНХАУ нь хөдөөгийн аялал жуулчлалаар дэлхийд тэргүүлж байгаа бөгөөд НҮБ-ын харьяа Дэлхийн Аялал Жуулчлалын Байгууллага Хятадын гадаад болон дотоод аялал жуулчлалын зах зээл бүрэн сэргэхийг тэсэн ядан хүлээж байна гэжээ.

НҮБ-ын ДАЖБ-ын зах зээлийн судалгаа, өрсөлдөх чадвар хариуцсан дарга Сандра Калвао хэлэхдээ: Сүүлийн жилүүдэд Аялал жуулчлалын чиг хандлага хөдөөгийн аялал руу илүүтэй шилжсэн бөгөөд КОВИД-19 цар тахал нь энэхүү хандлагыг илүү хурдасгаж шинэ боломжуудыг авчирсэн гэжээ. Түүний бодлоор энэхүү хандлага нь удаан үргэлжлэх бөгөөд дотоодын аялал жуулчлалын зах зээлийг нэмэгдүүлнэ гэсэн байна.

Хөдөөгийн аялал жуулчлалыг хөгжүүлэх үүднээс UNWTO нь 2021 оноос эхлэн Аялал Жуулчлалын Шилдэг Тосгон хөтөлбөрийг дэлхий даяар эхлүүлсэн. Өнгөрөгч 2 жилийн хугацаанд Хятадын Жежиан мужийн Юцүн, Аньхуй мужийн Шиди, Гуаньси мужийн Дажай болон Чунчинь мужийн Жинжү хотууд сонгогдсон юм.

Калваогийн хэлсэнээр: “Хөдөөгийн аялал жуулчлалын хөгжлийг үндэсний хэмжээний бодлогын дэмжлэггүйгээр явуулах боломжгүй бөгөөд Хятад улс бол хөдөөгийн аялал жуулчлалын хөгжлийг хурдасгахад хамгийн их анхаарал хандуулж, үүнд чиглэсэн тодорхой бодлого боловсруулсан орнуудын нэг юм. Дэд бүтэц зэрэг чухал асуудлуудад Хятад улс хөдөө орон нутагт хэрхэн дэмжлэг үзүүлж байгааг бид харлаа.” гэжээ.

Энэ оны эхний хагасын байдлаар дэлхийн хэмжээнд аялал жуулчлал, цар тахлын өмнөх үеийнхээс 80%-д хүрч сэргэж байгаа ч Ази тивийн тухайд энэхүү өсөлт харьцангуй удаашралтай бөгөөд дөнгөж 54%-д хүрчээ.  

“Хятад шиг ийм том зах зээл гадагш чиглэсэн хөдөлгөөнөө нээсэн нь Ази болон дэлхийн хэмжээнд аялал жуулчлалыг сэргээхэд чухад ач холбогдолтой бөгөөд энэхүү нөлөө нь энэ оны эцэс гэхэд мэдрэгдэх болно. Хятад улс нь хүчирхэг эдийн засаг төдийгүй олон улсын аялал жуулчлалын хамгийн том зах зээл бөгөөд дэлхийн аялал жуулчлалын салбарын үндэс суурь юм” гэж Калвао хэлсэн байна.

1. 7 сарын 10-ны (Да) өдрөөс цахимаар виз мэдүүлэх (Одоогийн байдлаар зөвхөн аялал жуулчлалын зорилгоор мэдүүлэх боломжтой) тохиолдолд визний хураамжийг цахимаар (кредит/дебит картаар) төлөх боломжийг бүрдүүллээ.
2. Япон Улсын Элчин сайдын яам Монгол Улсын Төрийн далбааны өдөр болон Үндэсний их баяр наадмын өдрүүдэд (2023.07.10-2023.07.14) ажиллахгүй тул 7 сарын 19-ний (Лха) өдрөөс хойш “Визний хураамжийг төлөх тухай” и-мэйл хүлээн авсан виз мэдүүлэгч хураамжаа цахимаар төлөх боломжтой.
3. Визний хураамжийг цахимаар төлөхийн тулд тус ЭСЯ-нд ирэх шаардлагагүй. Хураамжаа төлсний дараа цахим виз олгогдох болно.
4. Цахим виз(аялал жуулчлалын зорилго)-нээс бусад төрлийн визний хураамжийг урьдын адил бэлэн мөнгөөр төлөх бөгөөд цахимаар төлбөр хийх боломжгүй болохыг хатуу анхаарна уу.
5. Дэлгэрэнгүй мэдээлэл авахыг хүсвэл доорхи холбоосуудаар орж танилцана уу.

(1) Япон Улсын Гадаад хэргийн яамны цахим хуудас:
     (Япон хэлээр) https://www.mofa.go.jp/mofaj/toko/page22_004053.html
     (Англи хэлээр) https://www.mofa.go.jp/ca/cp/page22e_001033.html
 (2) eVISA буюу цахим виз олгох системд холбогдон виз мэдүүлэх аргачлалын талаар танилцуулсан YouTube сувгийн бичлэг:
　　(Япон хэлээр)  https://www.youtube.com/watch?v=MVzJXdyYPRE
　　(Англи хэлээр) https://www.youtube.com/watch?v=bvDpFIrgDEo
(3) JAPAN eVISA цахим хуудас:
　　(Англи хэлээр) https://www.evisa.mofa.go.jp/index

Засгийн газраас хэрэгжүүлж буй “Монголд зочлох жил”-ийн хүрээнд манай улс БНХАУ-аас 400 мянган жуулчин хүлээн авахыг зорьж байна.

Энэ онд “Нэг сая” жуулчин хүлээн авах үйл ажиллагааны хүрээнд урд хөршөөс дээрх тооны жуулчин хүлээн авах зорилтын хүрээнд Монгол, Хятадын аялал жуулчлалын компаниудын хоорондын уялдаа холбоог дэмжиж хамтран ажиллахаа БНХАУ-ын Бээжингийн Гадаад, соёл худалдааны нийгэмлэгийн тэргүүн Пан Чин Лин илэрхийлжээ. Түүнчлэн торгоны зам буюу “Бүс ба зам” төсөл нь хоёр улсын аялал жуулчлалын салбарт шинэ харилцаа эхлүүлэх боломж гэдгийг хоёр тал онцоллоо.

БНХАУ-д хийсэн Монгол Улсын Ерөнхий сайдын айлчлалын үеэр БОАЖ-ын сайд Б.Бат-Эрдэнэ тус улсын аялал жуулчлалын салбарын “China tourism group North China Region”, “CTG Travel service corporation Ltd”, “China Gaund Tourism group”, “Ctrip international Travel service”, “UTour Group Co.,Ltd”, “Tuniu Tour” зэрэг тэргүүлэх чиглэлийн 22 компанийн төлөөлөлтэй уулзан Монголын аялал жуулчлалын салбарт шинээр нэвтэрч буй үйл ажиллагаа, эвентүүдийн талаар таницуулсан юм. Уулзалтын хүрээнд хоёр орны хооронд дараах шат дараалсан үйл ажиллагааг явуулах төлвөлөөд байна. Үүнд:

• "Цайны их зам" 3 улсын аялал жуулчлалыг хөгжүүлэх ажлыг эргэн сэргээх,
• Хил орчмын аялал жуулчлалыг хамтран явуулна.
• Онлайн "Ctrip" агентлагтэй хамтран ажиллаж Монгол Улсын аялалын бүтээгдэхүүнүүдийг оруулж арилжаалах,
• "Бүс ба зам" эдийн засгийн коридорын хүрээнд аялал жуулчлалын цогц дэмжлэгийг үзүүлэх,
• Хятад жуулчдыг хүлээн авахад БНХАУ-ын аялал жуулчлалын бизнес эрхлэгч ТОП 22 компанитай хамтран ажиллах,
• Аялал жуулчлалын салбар дах хөрөнгө оруулалтыг дэмжин ажиллах юм. 

Эх сурвалж: Montsame

Монгол улс байгалийн үзэсгэлэнт тогтоц, өвөрмөц соёлоороо алдартай. Өргөн уудам говь нутгаас, Алтайн нурууны мөнх цаст оргилуудаараа хэзээнээс адал явдлыг эрэлхийлэгчдийн аялах дуртай чиглэл байсаар ирсэн.

Гэвч эдгээр сонирхол татахуйц шинж чанаруудыг үл харгалзан Монголын аялал жуулчлалын салбар бүрэн чадамждаа хүрэхгүй байх бэрхшээлтэй тулгарч байна. Гэсэн хэдий ч хиймэл оюун ухаан (AI) нь мэдэгдэхүйц өсөлтийн боломжийг олгож байгаа юм.

Дэлхийн аялал жуулчлалын салбарт хиймэл оюун ухаан нь чухал үүргийг аль хэдийн гүйцэтгэж эхэлсэн бөгөөд Монгол улсад ч мөн ялгаагүй. Хиймэл оюун ухааны хүчийг ашигласнаар Монголын аялал жуулчлалын салбар жинхэнэ боломжоо нээж чадна.

Хиймэл оюун ухааны тусламжтайгаар Монголын аялал жуулчлалын салбарыг хөгжүүлэх хэд хэдэн арга замыг дурдъя:

1. ХУВИЙН ЗӨВЛӨМЖҮҮД

Аялагчдад тулгардаг хамгийн том бэрхшээлүүдийн нэг бол шинэ газар очоод юу хийх, юу үзэхээ шийдэх явдал юм. Энэ үед л хиймэл оюун ухааны хэрэгцээ гарч ирнэ. Хиймэл оюун ухаан нь аялагчийн хүсэл сонирхол болон зан төлөвийн талаарх мэдээлэлд шинжилгээ хийснээр Монгол дахь үйл ажиллагаа, арга хэмжээ, аяллын чиглэлийн талаар хувийн зөвлөмж өгөх боломжтой. Энэ нь зөвхөн аялагчийн туршлагыг нэмэгдүүлэхээс гадна анзаарагддаггүй болон олон нийтэд төдийлөн танигдаагүй газруудыг сурталчлах давуу талтай.

2. ХЭРЭГЛЭГЧИЙН ҮЙЛЧИЛГЭЭГ САЙЖРУУЛАХ

Хэрэглэгчийн үйлчилгээ бол аялал жуулчлалын салбарын амин чухал зүйлсийн нэг. Аялагчид зочломтгой, анхаарал хандуулж буй мэдрэгдэж байгаа үйлчилгээнүүдийг авахыг хүсдэг бөгөөд хиймэл оюун ухаан нь хэрэглэгчийн үйлчилгээг сайжруулахад нэмэр болж чадна. Хиймэл оюун ухаан бүхий чатботууд нь үйлчлүүлэгчдэд цагийн зөрүү үл хамраан үйлчилгээ үзүүлж, асуултанд хариулж, тусламж үзүүлэх боломжтой. Энэ нь аяллын бизнес эрхлэгчдэд бусад чухал ажлууддаа анхаарлаа төвлөрүүлэх боломжийг олгохын зэрэгцээ хэрэглэгчийн туршлагийг ерөнхийд нь сайжруулдаг.

3. УРЬДЧИЛАН ТААМАГЛАХ АНАЛИТИК

Урьдчилан таамаглах аналитик шийдэл бол аялал жуулчлалын салбарт хиймэл оюун ухааны чухал оролцоонуудын нэг. Хиймэл оюун ухаан нь аялагчдын зан төлөвийн талаарх мэдээлэлд дүн шинжилгээ хийснээр чиг хандлага, хэв маягийг урьдчилан таамаглаж энэ нь аялал жуулчлалын бизнес эрхлэгчдэд бүтээгдэхүүн үйлчилгээнийхээ тухай маркетингийн итгэлтэй шийдвэрүүдийг гаргах боломжийг олгодог.

Жишээлбэл, хэрэв хиймэл оюун ухаан Монгол улсад морин аялал хийх сонирхол нэмэгдэх хандлагатай байна гэж таамаглавал бизнес эрхлэгчид санал болгож буй бүтээгдэхүүн, үйлчилгээнүүддээ тохиргоо хийж болно.

4. ХАМГААЛАЛТ, АЮУЛГҮЙ БАЙДАЛ

Аяллын аюулгүй байдал бол аялагч, жуулчдын хамгийн чухал асуудал бөгөөд хиймэл оюун ухаан нь эдгээр асуудлыг шийдвэрлэхэд тус болж чадна. Гэмт хэргийн түвшин болон бусад хүчин зүйлсийн мэдээлэлд дүн шинжилгээ хийснээр хиймэл оюун ухаан нь аялагчдад эрсдэл өндөр газруудыг тодорхойлж өгнө. Мөн энэ мэдээллийг орон нутгийн цагдаагийн байгуулгуудад өгөхөөс гадна, зарим газруудын гэрэлтүүлгүүдийг сайжруулах эргүүлүүдийг нэмэгдүүлэх зэрэг аюулгүй байдлыг сайжруулахад чиглэсэн стратеги боловсруулахад ашиглах боломжтой.

5. ҮР ДҮНТЭЙ МАРКЕТИНГ

Хиймэл оюун ухаан нь Монголын аялал жуулчлалын салбарт маркетингийн хувьд маш чухал хэрэгсэл болж чадна. Аялагчдын зах зээл, зан төлөв, сонголтын талаархи өгөгдөлд дүн шинжилгээ хийснээр маркетингийн хамгийн үр дүнтэй суваг болон мессежийг тодорхойлох боломжтой. Энэ нь Монгол руу чиглэх жуулчдын урсгалыг нэмэгдүүлэхэд тус нэмэр болж, аялал жуулчлалын эдийн засгийг хөгжүүлэхэд дэмжлэг болно.

Ерөнхийдөө, Хиймэл Оюун ухаан бол аялал жууллалын салбарыг өөрчлөхөд чухал үүрэг гүйцэтгэж байгаа бөгөөд Монгол улс үүнээс ашиг шим хүртэх боломж өндөр байна. Хиймэл оюун ухааны хүчийг ашигласнаар Монголын аялал жуулчлалын салбар тогтвортой, мэдэгдэхүйц өсөлтийг авах боломжтой.

МАЖХ

ОХУ-ын Бүгд Найрамдах Буриад Улс руу хөрш орнуудаас аялахад хямд өртөгтэй болж байна. Өнгөрөгч долоо хоногт Вагнер бүлгэмтэй холбоотой үйл явлдлаас болж рублийн ханш огцом унасан бөгөөд төгрөгтэй харьцах рублийн ханш 33-35 төгрөг болж буурчээ.

Өнгөрөгч 7 хоногт Улаанбаатар хотын валют арилжааны цэгүүд рубль худалдаж авахаа больсон бөгөөд “Найман Шарга” хаагдах үед рублийн ханш хамгийн ихдээ найман нэгжээр унасан байна.

Өнөөдрийн /2023/06/26/ байдлаар рублийн ханш бага зэрэг тогтворжиж 37-39 төгрөгтэй тэнцэж байгаа юм.

Сануулахад, ОХУ-Монголын жуулчдын урсгал нь Төгрөг-Рублийн харьцах ханшнаас шууд хамаардаг бөгөөд рублийн ханш чангарсан үед Орос жуулчид Монгол руу аялалд гардаг бол төгрөгийн ханш чангархад эсрэгээрээ.

Тиймээс, Оросын дотоод улс төрийн нөхцөл байдал тогтворжих үед Монголын жуулчдын урсгал нэмэгдэх нь ойлгомжтой юм.