СБД, Туушин оффис, 3 давхар 313 тоо info@travelmongolia.org
Image
Ажлын цаг
09:00 - 18:00
Холбоо барих
Image

МЭДЭЭ, МЭДЭЭЛЭЛ

БҮГД НАЙРАМДАХ ГРЕК УЛС, МОНГОЛ УЛСЫН ЗАСГИЙН ГАЗАР ХООРОНДЫН АГААРЫН ХАРИЛЦААНЫ ХЭЛЭЛЦЭЭРИЙГ СОЁРХОН БАТАЛЛАА

Өнгөрөгч мягмар гарагт /2024.02.27/ Грек улсын Зам тээвэр, дэд бүтцийн яамнаас өргөн барьсан Грек-Монголын хооронд дахь агаарын тээврийн харилцааны хэлэлцээрийг Бүгд Найрамдах Грек Улсын парламент соёрхон баталснаар хоёр улсын хооронд агаарын тээврийн үйлчилгээ хэрэгжиж болохуйц болж байна.

Грек улсын Зам тээвэр, дэд бүтцийн яамны дэд сайд Кристина Алексполугийн хэлснээр энэхүү шийдвэр нь Грекийн хөгжлийн хөтөлбөр болон үндэсний эдийн засагт эергээр нөлөөлөх олон улсын хэлэлцээр төдийгүй Монгол-Грек улсын хооронд агаарын шууд холболтыг бий болгох нь Грекийн оролцоо байхгүй байсан зах зээлд аялал жуулчлалыг хөгжүүлэх, өргөжүүлэх болон бизнесийн шинэ боломжуудыг бий болгоход томоохон түлхэц өгнө онцолжээ.

Парламентийн хэлэлцүүлгийн үеэр нислэгийн аюулгүй байдлын талаар яриа өрнөх үеэр дэд сайд Кристина Алексполу, хэлэлцээр дэх заалтууд дээр нислэгийн аюулгүй байдлын талаар томоохон заалтууд орсон байгааг дурдсан юм. Түүний хэлснээр Грекийн эрх бүхий байгууллагууд өөрийн нутаг дэвсгэрт байгаа Монголын талын ямар ч онгоцыг шалгах эрхтэй төдийгүй, аюулгүй байдлын дүрмийг хэрэгжүүлж байгаад Европын холбооны улсууд ч ажиглалт хийх эрхтэй гэсэн байна.

Эх сурвалж: Greek City Times

БНСУ МОНГОЛ РУУ ХИЙХ ШУУД НИСЛЭГИЙН ТООГ НЭМЭГДҮҮЛНЭ

БНСУ-ын Зам Тээврийн яамнаас эрэлт нэмэгдэж байгаа энэ үед хоёр орныг холбосон нислэгийн тоог нэмэгдүүлэхээр Монголын талтай тохиролцсоноо Ням /2024.02.25/ гарагт мэдэгдлээ.

Энэхүү шийдвэрийн дагуу БНСУ нислэгийн үйл ажиллагаагаа өргөтгөж одоо байгаа таван байршил дээр нэмээд хоёр нисэх онгоцны буудлаас нэмэлтээр нислэг үйлдэх юм байна. Эдгээр нь Чежү Олон Улсын Нисэх Онгоцны Буудал болон, Яньян Олон Улсын Нисэх Онгоцны Буудал бөгөөд Монгол улс руу нислэг үйлдэх хүсэлтэй дотоодын агаарын тээврийн компаниудын хүсэлтийг хүлээн авч эхэлжээ.

Түүнчлэн БНСУ, Монгол улс нь Бусан хотын Гимхэ Олон Улсын Нисэх Онгоцны Буудлаас хөөрдөг нислэгийн тоог 7 хоногт 6 байсныг 9 болгон нэмэгдүүлэхээр шийдвэрлэсэн байна. Мөн өмнө нь нисэх онгоцны хэмжээ болон суудлын тоо 200 байсан хязгаарлалтыг цуцлах тохиролцоонд хүрсэн юм.

БНСУ-аас Монгол улсыг зорих зорчигчдын оргил ачааллын үе нь 6-8-р сарын хооронд байдаг бөгөөд энэ үеэрх суудлын тоог хоёр дахин нэмэгдүүлэхээр болсон байна.

Уулзалтын үеэр хоёр улсын хооронд үйлдэгдэж буй нислэгийн тоог бүрэн цуцлах талаар ярилцсан ч БНСУ-ын агаарын тээврийн компаниуд зах зээлд давамгайлах хандлагатай байгаа тул уг тохиролцоонд хүрч чадсангүй гэж Ёнхап агентлаг мэдээлжээ.

БНСУ-ын Зам Тээврийн яамны мэдээлснээр хоёр улсын хооронд зорчигчдын тоо сүүлийн жилүүдэд мэдэгдэхүйц нэмэгдэж, 2021 онд 41,000 орчим байсан бол 2022 онд 318,000, 2023 онд 653,000-д хүрсэн гэнэ.

ЮНЕСКО: ХОЁР ЖИЛ ҮРГЭЛЖИЛСЭН ДАЙНЫ УЛМААС УКРАЙН УЛСЫН АЯЛАЛ ЖУУЛЧЛАЛЫН САЛБАР 3.5 ТЭРБУМ АМ.ДОЛЛАРЫН АЛДАГДАЛ ХҮЛЭЭЖЭЭ

НҮБ-ын Боловсрол, шинжлэх ухаан, соёлын байгууллага (ЮНЕСКО)-ийн судалгаагаар Орос-Украйны дайн эхэлснээс хойших буюу сүүлийн 2 жилийн хугацаанд Украйны соёл, аялал жуулчлалын салбар дахь дайны нөлөөллийн шинэ үнэлгээг тогтоосон байна. Аялал жуулчлалын салбарт учирсан хохирлын нийт өртөг 3.5 тэрбум ам.доллараар хэмжигдэж байгаа бөгөөд нөхөн сэргээхэд ойрын арван жилийн хугацаанд 9 тэрбум ам.доллар шаардлагатай болно. Энэ нь 2022 оны хоёрдугаар сараас хойш Дэлхийн банк, Украйны засгийн газар, Европын комисс, НҮБ-ын хамтран хийсэн хохирлын үнэлгээний 3 дахь судалгаа юм.

Украйны эрх баригчдын мэдээлснээр соёл, аялал жуулчлалын нийт 4779 өмч эвдрэл гэмтэл аваад байгаа бөгөөд үүнд; соёлын өвийн үнэ цэнтэй дурсгалт газар, барилга байгууламжууд, урлагийн бүтээл, цуглуулга, соёлын бүтээлч үйлдвэрлэлийн барилга байгууламжууд, аялал жуулчлалын газрууд багтжээ. Харьков муж хамгийн их хохирол амссан бөгөөд бүртгэгдсэн хохирлын 25%, Донецк муж 14.7%, Одесса муж 7.6%-ийг эзэлжээ.

2022 оны хоёрдугаар сараас хойш соёл, аялал жуулчлалын салбарын байгууллагууд 19.6 тэрбум ам.долларын алдагдал хүлээгээд байгаа бөгөөд үүний талаас илүү буюу 10.6 тэрбум ам.долларын алдагдалтайгаар Киев хот дангаараа эзэлж байна.

ЮНЕСКО-ийн мэдээлснээр Украйн улсын соёл, аялал жуулчлалын салбарыг сэргээх, сэргээн босголтын ажлыг санхүүжүүлэхэд 2024-2033 оны хугацаанд 9 тэрбум ам.доллар шаардлагатай гэж үзэж байна. Одоогийн байдлаар ЮНЕСКО өнгөрөгч 2 жилийн хугацаанд сэргээн босголтод зориулж гишүүн улсууд, хувийн хэвшлүүдээс 66 сая ам.долларыг босгоод байгаа бөгөөд Япон улс дангаараа 26 сая ам.долларын хандивыг өргөжээ.

ХОЙД СОЛОНГОС 2020 ОНООС ХОЙШ АНХ УДАА ГАДНЫН ЖУУЛЧИН ХҮЛЭЭЖ АВАХААР ЗЭХЭЖ БАЙНА

Хоёрдугаар сард Хойд Солонгосын нийслэл Пхеньян дахь орчин үеийн цанын баазад Оросын жуулчид 4 өдрийн аялал хийхээр болсон байна. 2020 оны 1-р сард ковид-19-ийн улмаас хилээ хааж байсан тус улс ийнхүү 4 жилийн дараа анх удаа гаднын жуулчид хүлээж авахаар болж байгаа юм.

Хойд Солонгосын хамгийн том дипломат холбоотон, эдийн засгийн түнш Хятад улсаас биш Оросоос жуулчин очихоор болсон нь гэнэтийн мэдээ байлаа.

Владивосток хотод төвтэй Восток Интур компанийн мэдэгдсэнээр 2-р сарын 9-нд эхлэх тус аялал нь нэг хүний 750 ам.доллар бөгөөд Алс Дорнодоос ирэх Оросын жуулчид Пхьенян-Умардын Масик чиглэлд 4 хоног аялах ажээ.

Приморийн мужийн захирагч Олег Кожемяко болон Хойд Солонгосын эрх баригчид тохиролцоонд хүрсний дагуу уг аялал зохион байгуулагдаж байгаа аж.

Хойд Солонгос Хятадаас урьтаж Оросын жуулчдыг хүлээн авч байгаа нь Ким Чен Ун ОХУ-тай түншлэлээ бэхжүүлэхэд анхаарч байгааг дахин нотолж байна гэж Сөүл дэх Кюннам их сургуулийн Алс Дорнод судлалын хүрээлэнгийн профессор Лим Юл Чун мэдэгдсэн байна. Цар тахлаас өмнө Хойд Солонгост ирсэн олон улсын жуулчдын 90-ээс дээш хувийг Хятад жуулчид эзэлж байсан тул Хятадаас ирэх аяллыг сэргээх нь Хойд Солонгост чухал хүчин зүйл хэвээр байх болно гэж тэрээр нэмж хэлжээ.

2019 онд Хойд Солонгост нийт 300,000 гаруй жуулчид ирж байсан бөгөөд ойролцоогоор 150 сая долларын орлого олж байсан байна.

 

НҮБ-ЫН АЯЛАЛ ЖУУЛЧЛАЛЫН БАЙГУУЛЛАГА ШИНЭЧЛЭЛТ ХИЙВ

НҮБ-ын харьяа Дэлхийн Аялал Жуулчлалын Байгууллага /UNWTO/-ийн нэрийг дурдах болон товчлоход төвөгтэй байгаа талаар хүн бүр ярьж байсан. Тэгвэл НҮБ, Дэлхийн Аялал Жуулчлалын Агентлагт рэбрэндинг хийж хялбар нэр оноож өгөхөөр болж байна.

Өнгөрөгч 10-р сард Самарканд хотод болсон НҮБ-ын Ерөнхий Ассамблейн үеэр  UNWTO буюу НҮБ-ын харьяа Дэлхийн Аялал Жуулчлалын Байгууллагын нэрийг сольж илүү хялбар “НҮБ Аялал Жуулчлал” хэмээх нэртэй болж байгаа талаар анх зарлаж байсан. WTO хэмээх товчлол нь үргэлж World Trade Organization-тэй андуурагддаг байсан бөгөөд шинэ нэр нь хүмүүст хайлт хийх болон нэрийг дуудахад илүү хялбар болж байна.

Мөн шинэ нэрний хамтаар шинэ уриа гарж ирсэн. Шинэ уриа нь “Дэлхийг ойртуулах” ажээ.

НҮБ Аялал Жуулчлалын шинэ брэнд ирэх хэдэн сарын хугацаанд олон нийтэд хүрэх бөгөөд вебсайт, сошиал медиа болон бусад мэдээллийн самбарууд мөн шинэчлэгдсэн байна.

Мадрид хотод төвтэй НҮБ Аялал Жуулчлал нь нийт 160 гишүүн орон, хэдэн зуун хувийн хэвшлийн салбар, олон бүс нутагт салбартай юм. Тэдний гол зорилго бол тогтвортой аялал жуулчлалыг дэмжих үүрэгтэй. Түүнчлэн дэлхийн аялал жуулчлалын гол дата, мэдээллийн эх сурвалж нь НҮБ Аялал Жуулчлал юм.

400 САЯ ГАРУЙ ХЭРЭГЛЭГЧТЭЙ TRIP.COM ГРУППТЭЙ ХАМТРАН АЖИЛЛАНА

 

Соёлын сайд Ч.Номин 54 дэх удаагийн Дэлхийн Эдийн Засгийн чуулганы үеэр Trip.com группийн Гүйцэтгэх захирал Жейн Сантай уулзаж аялал жуулчлалын салбарт хамтран ажиллах боломжийн талаар санал солилцлоо.

Уулзалтаар Соёлын сайд Ч.Номин Монгол Улсын Засгийн газраас баримталж буй аялал жуулчлалын бодлого болоод соёлын аялал жуулчлалын бүтээгдэхүүн үйлчилгээг хөгжүүлэх бодлогоо танилцууллаа. Монгол Улсын Засгийн газраас 2023-2025 оныг Монголд зочлох жил болгон зарласантай холбогдуулан энэ жил “Go Mongolia” үндэсний брэндингийг албан ёсоор танилцуулсан. Үүнтэй холбогдуулан Trip.com платформын бизнес загвар болох контентоор дамжуулан аялал жуулчлалын бүтээгдэхүүн сурталчлан танилцуулах, борлуулах чиглэлд хамтран ажиллахаар санал солилцлоо.

 

Trip.com нь дэлхий даяар 200 гаруй улс орон, бүс нутагт 1.4 сая гаруй зочид буудал, 5000 гаруй хотыг холбосон 2 сая гаруй нислэгийн сүлжээ бүхий платформ юм.

2024 ОНД ОЛОН УЛСЫН АЯЛАЛ ЖУУЛЧЛАЛ ЦАР ТАХЛЫН ӨМНӨХ ТҮВШИНД ХҮРНЭ

НҮБ-ын Дэлхийн Аялал Жуулчлалын Байгууллага энэ оны анхны аялал жуулчлалын барометрийг гаргасан байна. 2023 онд олон улсын аялал жуулчлал идэвхтэй сэргэж цар тахлын өмнөх үеийн 88%-д хүрсэн бөгөөд барагцаагаар 1.3 тэрбум жуулчин дэлхийн хэмжээнд зорчсон гэж тэмдэглэжээ. Нислэгийн тоо нэмэгдэж, Ази тивийн зах зээл илүү эрчимтэй сэргэж байгаа нь 2024 оны эцэс гэхэд Олон улсын аялал жуулчлал бүрэн хэмжээний сэргэлтэд хүрэх боломжтойг харуулж байгаа гэнэ.  

2023 онд Ойрхи Дорнод, Европ болон Африк тив хамгийн өндөр үзүүлэлттэй гарсан юм.

Дэлхийн Аялал Жуулчлалын Байгууллагаас гаргасан Барометр тооцоолол нь 2023 оны салбарын үзүүлэлтийг бүс нутаг бүрээр иж бүрэн тоймлон харуулж байна. Үүнд:

  • Ойрхи Дорнод нь 2019 оны үетэй харьцуулахад 22%-иар илүү жуулчин хүлээж авснаар бүс нутгийн сэргэлтээр тэргүүлсэн.
  • Европ нь дэлхийн хамгийн олон хүн зорчсон бүс нутаг болсон бөгөөд 2019 оныхтой түвшингийн 94%-д хүрсэн бөгөөд бүс нутгийн дотоод эрэлт болон АНУ-ын жуулчдын эрэлт харьцангуй их байв.
  • Африк цар тахлын өмнөх үетэй харьцуулахад 96%, Америк 90%-д хүрчээ.
  • Ази болон Номхон Далайн бүс нутаг цар тахлын өмнө үеийн 65%-д хүрсэн сэргэлтийг үзүүлсэн байна.

Түүнчлэн Олон улсын аялал жуулчлал 2023 оны байдлаар 1.4 их наяд ам.долларыг эргэлдүүлжээ. Энэ нь дэлхийн нийт бүтээгдэхүүний 3%-ийг бүрдүүлсэн гэсэн үг. Салбарын түүхэнд 2019 онд хамгийн их буюу 1.7 их наяд ам.долларт хүрж байсан түүх бий.

2024 ОНЫ ТААМАГЛАЛ

Олон улсын аялал жуулчлал нь 2024 онд бүрэн хэмжээндээ хүртлээ сэргэж 2019 оны үзүүлэлтийг 2%-иар давуулах тооцоллыг Дэлхийн Аялал Жуулчлалын Байгууллагаас гаргасан байна. Үүнд Ази тив ялангуяа БНХАУ-ын гадаад болон дотоод аялал жуулчлалын эрчимжилтэд орж байна. БНХАУ-ын хувьд Франц, Герман, Итали, Нидерланд, Испани, Малайзийн иргэдийг 2024 оны 11-р сарын 30-ний өдрийг хүртэл визгүй зорчуулах хүсэлт гаргажээ. Мөн Ойрхи Дорнод, Африк, Персийн булангийн орнууд руу аяллын нэгдсэн нэг визээр зорчих боломжтой болж байгаа аж.

Европын тухайд 2024 онд тэргүүлэх байр сууриа хадгалах шинжтэй. Учир нь 3-р сараас эхлэн Румын, Болгар зэрэг орнууд Шенгений бүсд элсэж байгаа бол Парис хотод зуны олимпын наадам зохион байгуулагдах юм.

2024 онд дэлхийн Эдийн засаг болон Геополитикийн ороо бусгаа байдал олон улсын аялал жуулчлалд томоохон сорилт үүсгэсэн хэвээр байх болно.Нефтийн үнийн тогтворгүй байдал, Инфляцийн өсөлт, Өндөр хүү, Худалдааны тасалдал зэрэг нь олон улсын аялал жуулчлалын байр, тээврийн үнийн тогтвортой байдалд нөлөөлөх таамаглалтай байна. Түүнчлэн бизнес эрхлэгчдийн хувтд өндөр эрэлтийг даван туулахын тулд ажиллах хүчин, боловсон хүчний хомсдол хэвээр байх аж.

 

2023 ОНД ХОНГКОНГТ 34 САЯ ЖУУЛЧИН ЗОРЧЖЭЭ

Өнгөрөгч бямба гарагт /2024.1.13/ Хонгконгийн аялал жуулчлалын зөвлөлөөс, өнгөрөгч 2024 онд 34 сая орчим жуулчинг хүлээн авсан тухай мэдэгдэл хийсэн байна. Зөвхөн 12-р сард л 4 сая жуулчин Хонгконгийг зорьжээ.

Хятадын эх газраас Хонгконг руу зорчигчид дээрх тооны ихэнх хувийг бүрдүүлсэн бөгөөд 5-р сарын амралт, зуны амралт болон 10-р сарын амралтын үеэр Хятад жуулчид хамгийн ихээр Хонгконгт зорчсон юм. Түүнчлэн 12-р сард Филиппин, Тайланд улсаас ирсэн жуулчдын тоо цар тахлын өмнөх үеийг давсан байна.

Жуулчдыг аяллын төрлөөр нь ангилахад хурал чуулган, үзэсгэлэнд оролцох зорилгоор ирэгсэд ихэнх хувийг эзэлсэн байна.  Мөн нэг жуулчин дунджаар 3.6 шөнийг Хонгконгт өнгөрүүлж байгаа бөгөөд Хонгконгийн аялал жуулчлалын зөвлөлийн хийсэн судалгаагаар жуулчдын сэтгэл ханамжийн үнэлгээ 10 онооноос 8.7 байгаа нь тахлын өмнөх үеийг давсан үзүүлэлт юм.

 

Image

Манай хаяг:

  • Сүхбаатар дүүрэг, 8-р хороо,
    Туушин оффис, 3 давхар 313 тоо
  • info@travelmongolia.org
  • +976-99072779

Нийгмийн сүлжээ